નરેન્દ્ર મોદી દેશની કાર પાછળના અરીસામાં જોઈને ચલાવી રહ્યા છે, જે પણ થશે કોંગ્રેસને જવાબદાર કહેશે : રાહુલ ગાંધી

કોંગ્રેસના (Congress) પૂર્વ અધ્યક્ષ રાહુલ ગાંધીએ(Rahul Gandhi) ફરી એકવાર ઓડિશામાં ટ્રેન દુર્ઘટનાને લઈને મોદી સરકાર પર નિશાન સાધ્યું છે. રાહુલે કહ્યું કે તમે તેમને (મોદી સરકાર) જે પણ પૂછશો, તેમને પૂછો કે ટ્રેન અકસ્માત કેમ થયો? તેઓ કહેશે કે જુઓ કોંગ્રેસે 50 વર્ષ પહેલા આવું કર્યું હતું. એટલે કે દેશમાં કંઈ પણ થાય જવાબદાર કોંગ્રેસને ગણાવશે. ઓડિશામાં શુક્રવારે થયેલી ટ્રેન દુર્ઘટનામાં અત્યાર સુધીમાં 275 લોકોના મોત થયા છે.

રાહુલ ગાંધી એક સપ્તાહના અમેરિકા પ્રવાસ પર છે. તેઓ અહીં વિવિધ કાર્યક્રમોમાં ભાગ લઈ રહ્યા છે અને મોદી સરકાર પર આકરા પ્રહારો કરી રહ્યા છે. સોમવારે તેમણે અમેરિકાના ન્યૂયોર્કમાં એનઆરઆઈને સંબોધિત કર્યા હતા. આ દરમિયાન રાહુલે કેન્દ્ર સરકાર પર નિશાન સાધતા કહ્યું કે તેમને પૂછો કે તમે પાઠ્ય પુસ્તકમાંથી પિરિયડિક ટેબલ કેમ હટાવી દીધું? તેઓ તરત જ કહેશે કે કોંગ્રેસે આ 60 વર્ષ પહેલા કર્યું હતું.

કાર માત્ર પાછળના અરીસામાં જોઈને ચાલતી નથી – રાહુલ

રાહુલે કહ્યું, તેઓ તરત જ જવાબ આપે છે કે પાછળ જુઓ. હવે તમારે વિચારવું પડશે. તમે બધા અહીં કાર દ્વારા આવ્યા છો. કલ્પના કરો કે જો તમે કાર ચલાવતી વખતે ફક્ત પાછળના અરીસામાં જ જોશો તો શું થશે? શું તમે કાર ચલાવી શકશો? એક પછી એક અકસ્માત થશે. મુસાફરો તમને પૂછશે કે તમે શું કરો છો?

રાહુલ ગાંધીએ વધુમાં કહ્યું કે, આ પીએમ મોદીની વિચારસરણી છે. તેઓ ભારતની કાર ચલાવવા માંગે છે, પરંતુ તેઓ માત્ર પાછળ જોઈ રહ્યા છે. તેઓ વિચારી શકતા નથી કે કાર કેમ આગળ નથી વધી રહી, શા માટે વારંવાર ધક્કો મારવો પડે છે? આ ભાજપ અને સંઘની વિચારસરણી છે. તમે મંત્રીઓ અને વડાપ્રધાનને સાંભળો, તેઓ માત્ર ઈતિહાસની વાત કરે છે. ભવિષ્ય વિશે કોઈ વાત કરતું નથી. તેઓ માત્ર લોકોને જ ઈતિહાસ માટે જવાબદાર ઠેરવે છે.

રાહુલ ગાંધીએ કહ્યું, ભારતમાં અલગ-અલગ વિચારધારાઓની લડાઈ ચાલી રહી છે. એક ભાજપનો છે અને એક કોંગ્રેસનો છે, એક તરફ નથુરામ ગોડસેની વિચારધારા છે અને બીજી તરફ આપણે મહાત્મા ગાંધીની વિચારધારાને આગળ લઈ જઈ રહ્યા છીએ. ગાંધીજી બ્રિટિશરો સાથે લડ્યા હતા, જેઓ તે સમયે અમેરિકા કરતાં મોટી શક્તિ હતા. તમે લોકો ગાંધી, આંબેડકર, પટેલ, નેહરુના પગલે ચાલી રહ્યા છો.