દાઉદ સાથે સબંધ ધરાવતા લોકો ચા પાર્ટી માટે ન આવ્યા એ સારું છે : એકનાથ શિંદે

મહારાષ્ટ્રના(Maharashtra) મુખ્ય પ્રધાન એકનાથ શિંદેએ(Eknath Shinde)  રવિવારે રાજ્ય વિધાનસભાના બજેટ સત્રની પૂર્વસંધ્યાએ પરંપરાગત ચા પાર્ટીનો બહિષ્કાર કરવા બદલ વિપક્ષ પર પ્રહાર કર્યો અને કહ્યું કે આતંકવાદી દાઉદ ઈબ્રાહિમ સાથેના સંબંધો ધરાવતા લોકો સામે ન આવ્યા તે સારું છે. સોમવારથી શરૂ થયેલું રાજ્ય વિધાનસભાનું બજેટ સત્ર 25 માર્ચે સમાપ્ત થશે. વિરોધ પક્ષો – રાષ્ટ્રવાદી કોંગ્રેસ પાર્ટી (NCP), શિવસેના (ઉદ્ધવ બાળાસાહેબ ઠાકરે) અને કોંગ્રેસે રવિવારે સરકાર દ્વારા આયોજિત ચા પાર્ટીનો બહિષ્કાર કર્યો હતો.

મુખ્ય પ્રધાન શિંદેએ બાદમાં અહીં પત્રકારોને કહ્યું, “એક રીતે, તે સારું છે કે વિપક્ષો હાઈ ટી માટે આવ્યા ન હતા કારણ કે તેમાંથી કેટલાક આતંકવાદી દાઉદ ઈબ્રાહિમ સાથે સંબંધ ધરાવે છે. અમારા ગઠબંધન (શિવસેના-ભાજપ)ને મહારાષ્ટ્ર વિરોધી કહેવાને બદલે તમે આ લોકોને રાષ્ટ્રવિરોધી નહીં કહેશો?

શિંદે દેખીતી રીતે ભૂતપૂર્વ રાજ્ય મંત્રી અને એનસીપી નેતા નવાબ મલિકનો ઉલ્લેખ કરી રહ્યા હતા, જે ગયા વર્ષે દાઉદ ઈબ્રાહિમ અને તેના સહયોગીઓની પ્રવૃત્તિઓ સાથે સંકળાયેલા મની લોન્ડરિંગ કેસમાં ધરપકડ થયા બાદ જેલમાં છે. મુખ્યમંત્રીએ એનસીપીના વરિષ્ઠ નેતા અને પૂર્વ નાયબ મુખ્યમંત્રી અજિત પવાર પર પણ નિશાન સાધ્યું.

તેમણે કહ્યું, “અજિત પવાર કહી રહ્યા છે કે મેં મારી નિષ્ઠા બદલી છે પરંતુ તેમણે એ ન ભૂલવું જોઈએ કે હું એ જ રસ્તે ચાલી રહ્યો છું જે બાળાસાહેબ ઠાકરેએ અમને બતાવ્યો હતો. અમને શિવસેનાનું નામ અને ધનુષ બાણ ફાળવવાના ચૂંટણી પંચના નિર્ણયથી પણ આ વાત સાબિત થાય છે.