બુધવારે PMના નિવાસસ્થાને યોજાઈ BJPની મોટી બેઠક , lસરકાર અને સંગઠનમાં ફેરબદલની શક્યતા
કેન્દ્રમાં નરેન્દ્ર મોદી સરકારના બીજા કાર્યકાળને 4 વર્ષથી વધુ સમય થઈ ગયો છે. આ 4 વર્ષમાં માત્ર એક જ વખત કેન્દ્રીય મંત્રીમંડળમાં ફેરબદલ કરવામાં આવ્યો છે. આગામી વર્ષે 2024માં લોકસભાની ચૂંટણી યોજાવા જઈ રહી છે. તે પહેલા મોદી સરકારમાં મોટો ફેરબદલ થઈ શકે છે. આ સાથે પાર્ટી સંગઠનમાં પણ મોટા ફેરફારોની શક્યતાઓ છે. આ મામલે બુધવારે પીએમના નિવાસસ્થાને બીજેપી અધ્યક્ષ જેપી નડ્ડા, કેન્દ્રીય ગૃહ મંત્રી અમિત શાહ અને સંગઠન મહાસચિવ બીએલ સંતોષની બેઠક યોજાઈ હતી.
આ બેઠક બુધવારે સાંજે 7 વાગ્યે પીએમના નિવાસસ્થાને શરૂ થઈ હતી અને આ બેઠક 4 કલાકથી વધુ ચાલી હતી. ભૂતકાળમાં, જેપી નડ્ડા, અમિત શાહ અને બીએલ સંતોષે ઘણા મોટા સંઘ નેતાઓ સાથે ઘણી બેઠકો કરી હતી. માનવામાં આવી રહ્યું છે કે આ બેઠકમાં ફેરબદલને મંજૂરી આપવામાં આવી છે અને ચોમાસુ સત્ર પહેલા મોદી કેબિનેટમાં નવા ચહેરાઓને સામેલ કરવામાં આવી શકે છે. માનવામાં આવી રહ્યું છે કે મોદી સરકારમાં સામેલ ઘણા મંત્રીઓને સંગઠનમાં મોકલવામાં આવી શકે છે અને નવા ચહેરાઓને સરકારમાં સામેલ કરવામાં આવી શકે છે.
