ભારતીય સૈનિકો ચીનને તેની જ ભાષામાં આપશે જવાબ : સેનાના જવાનોને અપાશે ચીની ભાષાની તાલીમ

ભારતીય સેનાના(Indian Army) જવાનોને ચીની ભાષામાં તાલીમ આપવામાં આવશે. આ સંદર્ભમાં, બુધવારે સોનિતપુર જિલ્લા મુખ્યાલય તેજપુર ખાતે ભારતીય સેના અને તેઝપુર યુનિવર્સિટી વચ્ચે એક એમઓયુ પર હસ્તાક્ષર કરવામાં આવ્યા હતા.

ભારતીય સેના અને તેજપુર યુનિવર્સિટી વચ્ચે થયેલા કરાર પર યુનિવર્સિટીના વાઇસ ચાન્સેલર પ્રોફેસર એચએન સિંહની હાજરીમાં હસ્તાક્ષર કરવામાં આવ્યા હતા. આ વાતનો ખુલાસો સેનાના પ્રવક્તાએ કર્યો છે. આ અંતર્ગત તેજપુર યુનિવર્સિટીમાં ભારતીય સેનાને 16 અઠવાડિયા સુધી ચીની ભાષા શીખવવામાં આવશે.

તેઝપુર યુનિવર્સિટી એ ઉત્તરપૂર્વ ભારતમાં ચીની સહિતની વિદેશી ભાષાઓના શિક્ષણમાં અગ્રણી શૈક્ષણિક સંસ્થાઓમાંની એક છે. ચાઈનીઝ ભાષાનો કોર્સ લેવાથી આર્મીના જવાનોની મેન્ડરિન ક્ષમતાઓમાં સુધારો થશે અને જો જરૂરી હોય તો ભારતીય સેનાના જવાનોને ચીની સૈન્ય કર્મચારીઓ સાથે વ્યવહાર કરવા માટે સશક્ત બનાવશે. ચીની ભાષામાં નિપુણતા મેળવીને સેનાના જવાનો ચીન સાથે જોડાયેલી કોઈપણ વાતને સમજદારીપૂર્વક વ્યક્ત કરી શકશે.