UPI અને PayNow વચ્ચે લિંક સેવા થશે શરૂ : ભારત અને સિંગાપોરને થશે ફાયદો
Link service between UPI and PayNow will start: India and Singapore will benefit
વડા પ્રધાન નરેન્દ્ર મોદી(Narendra Modi) અને તેમના સિંગાપોરના (Singapore) સમકક્ષ લી સિએન લૂંગ આજે વિડિયો કોન્ફરન્સ દ્વારા ભારતના યુનિફાઇડ પેમેન્ટ્સ ઇન્ટરફેસ (UPI) અને સિંગાપોરના PayNow વચ્ચે મની ટ્રાન્સફર લિંક સેવાના પ્રારંભના સાક્ષી બનશે. વડા પ્રધાન કાર્યાલય (PMO) એ સોમવારે એક નિવેદનમાં આ માહિતી આપી. PMO અનુસાર, રિઝર્વ બેંક ઓફ ઈન્ડિયા (RBI)ના ગવર્નર શક્તિકાંત દાસ અને મોનેટરી ઓથોરિટી ઓફ સિંગાપોર (MAS)ના મેનેજિંગ ડિરેક્ટર રવિ મેનન આ પહેલ શરૂ કરશે.
પીએમઓએ કહ્યું કે ભારત ફિનટેક ઇનોવેશન માટે સૌથી ઝડપથી વિકસતી ઇકોસિસ્ટમ તરીકે ઉભરી આવ્યું છે. ભારતના શ્રેષ્ઠ ડિજિટલ પેમેન્ટ ઈન્ફ્રાસ્ટ્રક્ચરના વૈશ્વિકીકરણને આગળ વધારવામાં વડાપ્રધાન મોદીનું દૂરંદેશી નેતૃત્વ મહત્ત્વપૂર્ણ રહ્યું છે.
નિવેદનમાં કહેવામાં આવ્યું છે કે વડા પ્રધાન મોદીનો મુખ્ય ભાર એ સુનિશ્ચિત કરવા પર રહ્યો છે કે UPIનો લાભ માત્ર ભારત પૂરતો મર્યાદિત ન રહે, પરંતુ અન્ય દેશોને પણ તેનો લાભ મળે. આ બે પેમેન્ટ સિસ્ટમનું જોડાણ બંને દેશોના રહેવાસીઓને ક્રોસ બોર્ડર રેમિટન્સના ઝડપી અને ખર્ચ-કાર્યક્ષમ ટ્રાન્સફરમાં મદદ કરશે.
તે સિંગાપોરમાં ભારતીય પ્રવાસીઓને, ખાસ કરીને સ્થળાંતર કામદારો અને વિદ્યાર્થીઓને, સિંગાપોરથી ભારતમાં ભંડોળના તાત્કાલિક અને ઓછા ખર્ચે ટ્રાન્સફર દ્વારા મદદ કરશે.
