G-20 : ગાંધીનગરમાં 27 થી 29 ઓગસ્ટ દરમિયાન મુખ્ય વૈજ્ઞાનિક સલાહકાર રાઉન્ડ ટેબલ કોન્ફરન્સ

G-20ના મુખ્ય વૈજ્ઞાનિક સલાહકારોની રાઉન્ડ ટેબલ કોન્ફરન્સનું આયોજન 27 થી 29 ઓગસ્ટ દરમિયાન લીલા હોટેલ, ગાંધીનગર, ગુજરાત ખાતે કરવામાં આવ્યું છે. ત્રણ દિવસીય આ બેઠકમાં G-20 સભ્ય દેશોના પ્રતિનિધિઓ અને કેટલાક વિશેષ આમંત્રિતો ભાગ લેશે.

અધિકારીઓએ જણાવ્યું કે 27 ઓગસ્ટે લીલા હોટેલમાં સાઉદી અરેબિયા, ઓસ્ટ્રેલિયા અને બ્રિટનના અધિકારીઓ સાથે ત્રણ દ્વિપક્ષીય બેઠક યોજાશે. ચોથી દ્વિપક્ષીય બેઠક મહાત્મા મંદિર કન્વેન્શન સેન્ટર (MMCC) ના બોર્ડરૂમમાં બપોરે 02.15 થી 02.45 વાગ્યા સુધી યોજાશે. આ બેઠકો પૂર્ણ થયા બાદ વિદેશના પ્રતિનિધિઓ ગુજરાતના સમૃદ્ધ વારસાનો અનુભવ કરવા મહેસાણા જિલ્લાના મોઢેરા ખાતેના સૂર્ય મંદિરની મુલાકાત લેશે.

‘વન હેલ્થ’ વિષય પરની બેઠક 28 ઓગસ્ટે હોટેલ લીલા ખાતે શરૂ થશે. આ પછી મહાત્મા મંદિરના બોર્ડરૂમમાં મુખ્ય વૈજ્ઞાનિક સલાહકારોની બેઠક શરૂ થશે. ગુજરાતના ગ્રામીણ વિકાસ વિભાગના અગ્ર સચિવ મોના ખંધાર સ્વાગત પ્રવચન આપશે. કેન્દ્ર સરકારના મુખ્ય વૈજ્ઞાનિક સલાહકાર અજય કે. સૂદ પણ સભાને સંબોધશે. આ પછી બેઠકનું પ્રથમ સત્ર યોજાશે. પ્રથમ સત્રની થીમ ‘બહેતર રોગ નિયંત્રણ અને રોગચાળાની સજ્જતા માટે એક સ્વાસ્થ્યમાં તકો’ છે.

અધિકારીઓએ જણાવ્યું હતું કે મીટિંગનું બીજું સત્ર ‘સ્કોલરલી સાયન્ટિફિક નોલેજની પહોંચને વિસ્તૃત કરવા માટે વૈશ્વિક પ્રયાસોનું સંકલન’ વિષય પર યોજાશે. ત્રીજું સત્ર લંચ અને આરામ પછી યોજાશે. આ સત્ર ‘વિજ્ઞાન અને ટેકનોલોજીમાં વિવિધતા, સમાનતા, સમાવેશ અને સુલભતા’ વિષય પર હશે. ચોથું સત્ર ‘એક ઇન્સ્ટિટ્યુશનલ મેકેનિઝમ ફોર ઇન્ક્લુઝિવ, સસ્ટેનેબલ એન્ડ એક્શન ઓરિએન્ટેડ ગ્લોબલ સાયન્સ એન્ડ ટેક્નોલોજી પોલિસી ડાયલોગ’ થીમ પર હશે. અજય કે. સૂદ વિદાય સત્રને સંબોધશે. આ પત્રકાર પરિષદ MMCC પરિસરમાં સાંજે 6 થી 6.45 દરમિયાન યોજાશે. આ ઉપરાંત ભારત અને વિદેશના પ્રતિનિધિઓ માટે 29 ઓગસ્ટના અંતિમ દિવસે વહેલી સવારે ખાસ હેરિટેજ વોકનું પણ આયોજન કરવામાં આવ્યું છે.