પાન માવાની પિચકારીથી શહેરની સુંદરતામાં બગાડો કરી રહ્યા છે કેટલાક લોકો
Some people are spoiling the beauty of the city by throwing pan mawa
સુરત (Surat) શહેરમાં દિવાળી પહેલા મહાનગરપાલિકા દ્વારા શહેરની સુંદરતામાં વધારો કરવા માટે શહેરના અનેક ફ્લાયઓવર બ્રિજની દિવાલો પર પેઇન્ટિંગ કરવામાં આવી રહ્યું છે. એક તરફ ફ્લાયઓવર બ્રિજ તૈયાર થાય તે પહેલા જ તેને અલગ-અલગ કલરથી રંગવામાં આવી રહ્યો છે ત્યારે આ પેઇન્ટિંગમાં કેટલાક લોકો પાન-માવા અને ગુટખાની પિચકારીથી દિવાલને ગંદી કરી રહ્યા છે. કેટલાક સુરતીઓના કારણે તમામ સુરતીઓની મહેનતની કમાણી પરના ટેક્સને કારણે પેઇન્ટિંગ બગડી રહી છે.
આ દિવસોમાં સુરત મહાનગર પાલિકા દ્વારા શહેરની સુંદરતા વધારવા માટે સફાઈ અભિયાનની સાથે બ્યુટીફિકેશનની કામગીરી કરવામાં આવી રહી છે. અર્બન બ્યુટીફિકેશન અંતર્ગત શહેરની સુંદરતામાં વધારો કરવા માટે મહાનગરપાલિકા પ્રશાસન દ્વારા અનેક પ્રયાસો કરવામાં આવી રહ્યા છે. આ અંતર્ગત પારલે પોઈન્ટ ફ્લાય ઓવરબ્રિજ પર ફ્લાવર પોટ્સ મૂક્યા બાદ, ઉધના ગોચર ખાતે ફ્લાય ઓવરબ્રિજના ઉપરના ભાગમાં બનાવવામાં આવેલા ડિવાઈડરને ઝેબ્રા કલરના બદલે રંગબેરંગી રંગોથી શણગારવામાં આવ્યા છે. આ ઉપરાંત અડાજણ ગુજરાત ગેસ સર્કલ પર બનેલા ફ્લાયઓવર બ્રિજની બંને બાજુની દિવાલો પર આકર્ષક પેઇન્ટિંગ કરવામાં આવ્યા છે. જેના કારણે શહેરની સુંદરતા વધી રહી છે.
સુરત શહેરની સુંદરતા વધારવા માટે મહાનગરપાલિકા દ્વારા અનેક પ્રયાસો કરવામાં આવી રહ્યા છે. પરંતુ શહેરની સુંદરતામાં કેટલાક લોકો વિલન બની રહ્યા છે. સુરતની સુંદરતા બગાડવા માટે લોકો પાન-માવા, ગુટખાનું સેવન કરીને અને ચાલતા વાહનોમાંથી પિચકારી ફેંકીને વિલન બની રહ્યા છે. સુરત કોર્પોરેશન અડાજણમાં ફ્લાયઓવર બ્રિજને આકર્ષક રંગોથી પેઇન્ટ કરી રહી છે, પરંતુ પાન માવા ખાનારા અને ડ્રાઇવિંગ કરતા લોકો પેઇન્ટિંગને બગાડી રહ્યા છે.
