દેશના 12 રૂટો પર જલ્દી શરૂ કરવામાં આવશે રેલ-પોસ્ટ ગતિ શક્તિ કાર્ગો સેવા

સુરતમાં (Surat) રેલ-પોસ્ટ ગતિ શક્તિ એક્સપ્રેસ કાર્ગો (Cargo) સેવાની સફળ ટ્રાયલ બાદ દેશના અન્ય 12 રૂટ(Route) પર પણ આવી જ સેવા શરૂ કરવાની યોજના છે. તાપ્તી ગંગા એક્સપ્રેસ સાથે એક VPU ને જોડીને સુરતથી વારાણસી વચ્ચે ટ્રાયલ રન સેવા 31 માર્ચ 2022 ના રોજ શરૂ થઈ. સફળતા બાદ 16 ફેબ્રુઆરીથી અન્ય ત્રણ રૂટ પર સમયમર્યાદાવાળી ટ્રેન સેવા શરૂ કરવામાં આવી છે.

કેન્દ્રીય રેલ્વે અને કાપડ રાજ્ય મંત્રી દર્શના જરદોષે સુરત રેલ્વે સ્ટેશન ખાતે આયોજિત એક કાર્યક્રમમાં રેલ્વે અને પોસ્ટ વિભાગના સંયુક્ત પ્રયાસોથી પાર્સલ ટ્રેન દોડાવવાની જાહેરાત કરી હતી. વર્ષ 2022-23ના બજેટમાં જાહેરાત બાદ સુરતના કાપડ બજારને ધ્યાનમાં રાખીને ટ્રાયલ રન સેવા શરૂ કરવામાં આવી હતી. સિંગલ પાર્સલ વેન મોડ પર 99 ટ્રાયલ અને ફુલ ટ્રેન લોડ મોડ પર 16 ટ્રાયલ કર્યા પછી, રેલ્વેએ તેને સમગ્ર દેશમાં રોલ આઉટ કરવાનો નિર્ણય કર્યો છે. તાજેતરમાં સુરતથી નારાયણપુર અનંત, દિલ્હીથી હાવડા અને બેંગ્લોરથી ગુવાહાટી વચ્ચે પાર્સલ ટ્રેન દોડાવવામાં આવી છે.

રેલવે હવે દેશના જુદા જુદા રૂટ પર સમાન કાર્ગો ટ્રેન સેવા શરૂ કરવાની યોજના પર કામ કરી રહી છે. રેલવે અધિકારીઓએ રૂટની ઓળખ કરી લીધી છે. કાર્ગો સેવા શરૂ થવાથી વેપારીઓ સસ્તા દરે સુરક્ષિત પાર્સલ મોકલી શકશે.

મોબાઇલ એપ્લિકેશન દ્વારા પાર્સલ ટ્રેક કરવામાં આવશે

સૂત્રોએ જણાવ્યું કે વેપારીઓ રેલ-પોસ્ટ ગતિ શક્તિ એક્સપ્રેસ કાર્ગો સર્વિસ દ્વારા મોકલવામાં આવેલા પાર્સલને ટ્રેક કરી શકશે. આ માટે રેલવેએ એક મોબાઈલ એપ્લિકેશન તૈયાર કરી છે. તેના દ્વારા ગ્રાહકો ઓનલાઈન પેમેન્ટની સુવિધા સાથે સામાન બુક કરાવી શકે છે. તમે એપ પર જ લાઇવ ટ્રેકિંગ સુવિધા સાથે કન્સાઇનમેન્ટની સ્થિતિને પણ ટ્રૅક કરી શકો છો.