ગુજરાતમાં આ ચોમાસામાં ડેમો થયા છલોછલ : 94 ડેમ 90 ટકાથી વધુ ભરાયા
Dams burst in this monsoon in Gujarat: 94 dams filled more than 90 percent
ગુજરાતમાં આ ચોમાસામાં ભારે વરસાદને કારણે ડેમોમાં પાણીનો સંગ્રહ સતત વધી રહ્યો છે. રાજ્યના નર્મદા (સરદાર સરોવર) સહિત કુલ 207 ડેમમાંથી 58 ડેમ ઓવરફ્લોની સ્થિતિમાં છે. રવિવાર સુધીમાં, 94 ડેમ તેમની ક્ષમતાના 90 ટકાથી વધુ સંગ્રહ સાથે હાઇ એલર્ટ પર છે. રાજ્યના સૌથી મોટા નર્મદા ડેમમાં કુલ ક્ષમતાના 77.68 ટકા પાણીનો સંગ્રહ થયો છે.
સૌથી વધુ 141 ડેમ ધરાવતા સૌરાષ્ટ્ર પ્રદેશે તેની ક્ષમતાની સામે અત્યાર સુધીમાં 83.95 ટકા જળસંગ્રહ હાંસલ કર્યો છે. આ તમામ ડેમની જળ સંગ્રહ ક્ષમતા 2588.49 મિલિયન ક્યુબિક મીટર (MCM) છે. હાલમાં આમાં 2173.13 MCM પાણીનો સંગ્રહ છે. આ પ્રદેશમાં કુલ 43 ડેમોએ તેમની ક્ષમતાના 100 ટકા જળસંગ્રહ હાંસલ કર્યો છે. દક્ષિણ ગુજરાતના 13 ડેમની ક્ષમતા 8617.73 MCM છે, જેની સામે આ ડેમોમાં પાણીનો સંગ્રહ 6512.28 MCM એટલે કે 75.57 ટકા છે. દક્ષિણ ગુજરાતના ચાર ડેમ ઓવરફ્લોની સ્થિતિમાં છે. ઉત્તર ગુજરાતના 15 ડેમોમાં 1932 MCMની સામે 1427.43 MCM પાણીનો સંગ્રહ થયો છે જે 73.85 ટકા છે. આ ઉપરાંત કચ્છ વિસ્તારના 20 ડેમોમાં ક્ષમતાની સામે 66 ટકાથી વધુ પાણીનો સંગ્રહ થયો છે અને પ્રદેશના આઠ ડેમ ભરાઈ ગયા છે.
મધ્ય ગુજરાતના ડેમોમાં સૌથી ઓછો પાણીનો સંગ્રહ થયો છે. આ વિસ્તારમાં અત્યાર સુધીમાં 48.43 ટકા પાણીનો સંગ્રહ થયો છે. 17 ડેમની કુલ જળ સંગ્રહ ક્ષમતા 2331.01 MCM છે અને 1128.92 MCM પાણી એકત્ર થયું છે. સૌથી મોટા નર્મદા ડેમની જળ સંગ્રહ ક્ષમતા 9460 MCM છે. હાલમાં આ ડેમમાં 7348.89 MCM પાણીનો સંગ્રહ થયો છે જે 77.68 ટકા છે. રવિવારે ડેમની જળ સપાટી 131.86 મીટરે પહોંચી હતી. આ રીતે, નર્મદા સહિત રાજ્યના તમામ મુખ્ય 207 ડેમોમાં 25262.29 MCM પાણી સંગ્રહ ક્ષમતા છે અને અત્યાર સુધીમાં 18806.61 MCM પાણીનો સંગ્રહ થયો છે જે 74.45 ટકા છે.
73 ડેમમાં 70 ટકાથી ઓછો પાણીનો સંગ્રહ
રાજ્યના 73 મોટા ડેમોમાં તેમની ક્ષમતા સામે 70 ટકા કરતા ઓછો પાણીનો સંગ્રહ છે. જ્યારે 94 ડેમમાં 90 ટકાથી વધુ પાણીનો સંગ્રહ થયો છે. આ તમામ ડેમ હાઈ એલર્ટની સ્થિતિમાં છે. તેમાંથી 58 એવા છે કે જે 100 ટકા સુધી ભરાયા છે. 27 ડેમમાં પાણીનો સંગ્રહ ક્ષમતાના 80 થી વધુ અને 90 ટકા કરતા ઓછો છે જે ચેતવણી તરીકે દર્શાવવામાં આવ્યો છે અને 12 ડેમમાં 70 થી વધુ અને 80 ટકાથી ઓછો પાણીનો સંગ્રહ છે જે ચેતવણી તરીકે દર્શાવવામાં આવ્યા છે.
