પાંચ વર્ષ પછી ભારતે કર્યો એશિયા કપ પર કબ્જો : પણ વર્લ્ડકપને લઈને રોહિત શર્માએ કરી આ ટેંશનવાળી વાત

પાંચ વર્ષ બાદ ભારતે(India) ફરી એકવાર એશિયા કપનો ખિતાબ જીત્યો. રોહિત શર્માની કપ્તાનીમાં ટીમ ઈન્ડિયાએ ફાઇનલમાં શ્રીલંકાને 10 વિકેટથી હરાવ્યું અને આઠમી વખત આ ટૂર્નામેન્ટ જીતી. કોલંબોમાં આ જીતે વર્લ્ડ કપ પહેલા ટીમ ઈન્ડિયાની તૈયારીઓની સારી તસવીર રજૂ કરી છે અને આશાઓ વધારી છે. આ હોવા છતાં, એક વાત એવી છે જેણે ટીમ ઇન્ડિયાને ફરીથી થોડું ટેન્શન આપ્યું છે, જે આગામી થોડા દિવસો સુધી ચાલુ રહેવાનું છે. આ છે શ્રેયસ અય્યર અને અક્ષર પટેલની ફિટનેસ અને કેપ્ટન રોહિત શર્માએ પણ બંનેની સ્થિતિ અંગે અપડેટ આપી છે.

કોલંબોના આર પ્રેમદાસા સ્ટેડિયમમાં રવિવારે 17 સપ્ટેમ્બરે રમાયેલી ફાઈનલમાં ટીમ ઈન્ડિયાનો દબદબો જોવા મળ્યો હતો. આ મેચમાં ભારતીય ટીમે મોહમ્મદ સિરાજ સહિત તેના ઝડપી બોલરોના દમ પર શ્રીલંકાને માત્ર 50 રનમાં આઉટ કરી દીધું હતું. આ પછી શુભમન ગિલ અને ઈશાન કિશને માત્ર 6.1 ઓવરમાં જ લક્ષ્યાંક હાંસલ કરીને ટીમને ચેમ્પિયન બનાવી હતી. આ જીતમાં પણ ટીમ ઈન્ડિયા માટે આગામી દિવસોનું ટેન્શન અકબંધ રહ્યું હતું. આ ટેન્શન અક્ષર પટેલની ઈજા છે.

શું છે અક્ષર પટેલની હાલત?

ટીમ ઈન્ડિયા પહેલાથી જ શ્રેયસ અય્યરની પીઠના દુખાવાથી પરેશાન હતી, જે ટૂર્નામેન્ટની મધ્યમાં જકડાઈ જવાને કારણે ગ્રુપ રાઉન્ડ પછી કોઈ મેચ રમી શક્યો ન હતો. આ પછી, ડાબોડી સ્પિન-ઓલરાઉન્ડર અક્ષર પટેલ બાંગ્લાદેશ સામે ઈજાગ્રસ્ત થયો હતો, જેના કારણે તે ફાઈનલમાં રમી શક્યો ન હતો. કેપ્ટન રોહિતે જીત બાદ પ્રેસ કોન્ફરન્સમાં બંનેની ઈજા અંગે અપડેટ આપી હતી. રોહિતે કહ્યું કે તેના હેમસ્ટ્રિંગમાં સમસ્યા છે, જેના કારણે તે કદાચ એક અઠવાડિયા કે 10 દિવસ માટે બહાર રહેશે.

શું શ્રેયસ ODI સિરીઝ રમી શકશે?

રોહિતે એમ પણ કહ્યું કે અક્ષર માટે ઓસ્ટ્રેલિયા સામેની વનડે શ્રેણીની પ્રથમ બે મેચમાં રમવું મુશ્કેલ છે. આ સાથે રોહિતે શ્રેયસ અય્યરની ફિટનેસ વિશે પણ અપડેટ આપ્યું અને કહ્યું કે તે લગભગ સ્વસ્થ થઈ ગયો છે. ભારતીય કેપ્ટને કહ્યું કે શ્રેયસ અય્યરે 99 ટકા ફિટનેસ માપદંડો હાંસલ કર્યા છે અને તે ODI શ્રેણી માટે ફિટ રહેશે. વર્લ્ડ કપ પહેલા આયોજિત આ ODI સિરીઝ 22 સપ્ટેમ્બરથી શરૂ થશે અને 27 સપ્ટેમ્બર સુધી ચાલશે.