Gujarat : આ શહેરમાં ‘પઠાણ’ ફિલ્મની રિલીઝ પહેલાં થયો હંગામો, પોસ્ટર ફાડી દર્શાવ્યો વિરોધ
વિશ્વ હિન્દુ પરિષદ અને બજરંગ દળના કાર્યકર્તાઓએ બુધવારે અમદાવાદના વસ્ત્રાપુર વિસ્તારમાં આવેલા એક મોલમાં હંગામો મચાવ્યો હતો અને હિન્દી ફિલ્મ પઠાણના પોસ્ટર ફાડી નાખ્યા હતા. પઠાણ ફિલ્મમાં શાહરૂખ ખાન અને દીપિકા પાદુકોણ મુખ્ય ભૂમિકામાં છે. પોલીસ ઇન્સ્પેક્ટર જે.કે.ડાંગરે જણાવ્યું હતું કે વસ્ત્રાપુર પોલીસ તાત્કાલિક ઘટનાસ્થળે પહોંચી હતી અને પાંચ કાર્યકરોની અટકાયત કરી હતી, જોકે બાદમાં તેમને છોડી મૂકવામાં આવ્યા હતા.
VHP દ્વારા શેર કરવામાં આવેલ વિડિયોમાં, કાર્યકરો સૂત્રોચ્ચાર કરતા અને પઠાણના પોસ્ટરો અને તેના કલાકારોના મોટા કટઆઉટને ફાડી નાખ્યા હતા. VHPના ગુજરાત યુનિટે અગાઉ કહ્યું હતું કે તે ફિલ્મને રાજ્યમાં પ્રદર્શિત કરવા દેશે નહીં.
દીપિકાના કપડાને લઈને વિવાદ
હકીકતમાં શાહરૂખ ખાનની ફિલ્મ ‘પઠાણ’ના એક ગીતમાં દીપિકા પાદુકોણના ડ્રેસને લઈને શરૂ થયેલો વિવાદ ધીમે ધીમે વધી રહ્યો છે. શાહરૂખ ખાનના ફેન્સ આ ફિલ્મની આતુરતાથી રાહ જોઈ રહ્યા છે. આ ફિલ્મ 25 જાન્યુઆરીએ રિલીઝ થવાની છે. તે જ સમયે, ‘પઠાણ’ રીલિઝ થાય તે પહેલા, ગુજરાતના અમદાવાદના એક મોલમાં તેના પ્રમોશન દરમિયાન ઘણો હોબાળો થયો હતો. અહીં બજરંગ દળના કાર્યકરોએ મોલમાં ઘૂસીને થિયેટરમાં તોડફોડ કરી હતી.
અમદાવાદના મોલમાં હોબાળો
બુધવારે અમદાવાદમાંથી એક વીડિયો સામે આવ્યો છે. બજરંગ દળના કાર્યકરોએ અમદાવાદના આલ્ફાવન મોલમાં પહોંચીને ફિલ્મ ‘પઠાણ’નો વિરોધ કર્યો હતો. આ સાથે શાહરૂખ ખાનના પોસ્ટર પણ ફાડી નાખવામાં આવ્યા હતા. મોલમાં પ્રવેશેલા બજરંગ દળના કાર્યકરો શાહરૂખ ખાન અને દીપિકા પાદુકોણની ફિલ્મને લઈને ખૂબ ગુસ્સે હતા.
લવ જેહાદને પ્રમોટ કરતી ફિલ્મ
વિરોધ દરમિયાન બજરંગ દળના કાર્યકર્તાઓએ ‘પઠાણ’ ફિલ્મને રિલીઝ ન કરવાની ચેતવણી પણ આપી છે. મોલમાં હંગામો થયા બાદ ત્યાં હાજર લોકોમાં ભારે ગભરાટ જોવા મળ્યો હતો. બીજી તરફ બજરંગ દળના પ્રમુખ જ્વલિત મહેતાએ કહ્યું કે ‘અમે દીપિકા પાદુકોણે પહેરેલા કપડાંનો વિરોધ કરીએ છીએ. તેણે કહ્યું કે ફિલ્મ ‘પઠાણ’ લવ જેહાદને પ્રોત્સાહન આપવા જઈ રહી છે. એટલા માટે અમે તેને રિલીઝ થવા દઈશું નહીં.
