જે-સ્લેબ ટ્રેક ટેક્નોલોજીથી તાપી નદી પર તૈયાર થઇ રહ્યો છે 720 મીટર લાંબો પુલ
A 720 meter long bridge is being prepared over Tapi river with J-slab track technology
દેશમાં બુલેટ ટ્રેનનું (Bullet Train) સપનું સાકાર થવા જઈ રહ્યું છે. મુંબઈ-અમદાવાદ વચ્ચે બુલેટ ટ્રેકનું કામ બુલેટની ઝડપે ચાલી રહ્યું છે. સુરત નજીક તાપી નદી પર 720 મીટર લાંબા પુલનો પાયો નાખવામાં આવી રહ્યો છે. આ પહેલા દક્ષિણ ગુજરાતમાં પાંચ નદીઓ પર પુલનું કામ પૂર્ણ કરવામાં આવ્યું છે.
મહારાષ્ટ્રની સરખામણીએ ગુજરાતમાં હાઈસ્પીડ ટ્રેન પ્રોજેક્ટનું કામ તેજ ગતિએ પૂર્ણ થઈ રહ્યું છે. એક પછી એક બ્રિજનું કામ પૂર્ણ કરવા પર ધ્યાન આપવામાં આવી રહ્યું છે. ગુજરાતમાં 85 કિલોમીટર લાંબી વાયડક્ટ તૈયાર છે.
નેશનલ હાઇ સ્પીડ રેલ કોર્પોરેશન લિમિટેડના જણાવ્યા અનુસાર સુરતમાં તાપી નદી પર 720 મીટર લાંબા પુલનો પાયો તૈયાર કરવામાં આવી રહ્યો છે. આ બ્રિજ સુરત અને ભરૂચ સ્ટેશન વચ્ચે હશે. ગુજરાતમાં નર્મદા નદી પર 1.2 કિલોમીટરનો સૌથી લાંબો પુલ બનાવવામાં આવી રહ્યો છે.
તે જ સમયે, મહારાષ્ટ્રનો સૌથી લાંબો પુલ વૈતરણા નદી પર 2.28 કિલોમીટરની લંબાઈ પર બનાવવામાં આવશે. આ સમગ્ર પ્રોજેક્ટ 508 કિલોમીટર લાંબો છે. દક્ષિણ ગુજરાતની જેમ આણંદ અને નડિયાદ વિસ્તારમાં પણ પ્રોજેક્ટનું કામ પૂરજોશમાં ચાલી રહ્યું છે. દક્ષિણ ગુજરાત અને મધ્ય ગુજરાતમાં કુલ 85 કિમીના વાયાડક્ટનું કામ પૂર્ણ થયું છે.
આ સાથે જ વલસાડ જિલ્લાની ઔરંગાબાદ નદી પર પાંચમો પુલ થોડા સમય પહેલા પૂર્ણ થયો છે. આ પુલ વાપી અને બીલીમોરા એચએસઆર સ્ટેશન વચ્ચે લગભગ 320 મીટર લાંબો છે. આ પહેલા પૂર્ણા, મીંધોળા અને અંબિકા ચાર નદી ક્રોસિંગ પર પુલ બનાવવામાં આવ્યા છે.
રેલ સ્તરના સ્લેબનું કામ પણ પૂર્ણ થયું
બીજી તરફ સુરત બુલેટ ટ્રેન સ્ટેશનનો કોન્કોર્સ અને રેલ લેવલનો સ્લેબ પણ પૂર્ણ થઈ ગયો છે. મુંબઈ-અમદાવાદ હાઈ સ્પીડ રેલ કોરિડોર પર ટ્રેક સિસ્ટમ માટે પ્રથમ રિઇનફોર્સ્ડ કોંક્રીટ (RC) ટ્રેક બેડ (જેમ કે જાપાનીઝ શિંકનસેનમાં વપરાય છે)નું બાંધકામ સુરતમાં શરૂ થયું છે. ભારતમાં પ્રથમ વખત J-સ્લેબ બેલાસ્ટલેસ ટ્રેક સિસ્ટમનો ઉપયોગ કરવામાં આવી રહ્યો છે.
