સુરતની સિવિલ હોસ્પિટલના જુના ટ્રોમા સેન્ટરનું થશે રીનોવેશન : ઇમરજન્સી વિભાગોને કરવામાં આવશે શિફ્ટ
The old trauma center of Surat Civil Hospital will be renovated
દક્ષિણ ગુજરાતની(South Gujarat) સૌથી મોટી નવી સિવિલ હોસ્પિટલ સંકુલમાં જૂના ટ્રોમા સેન્ટરનું રિનોવેશન(Renovation) પૂર્ણ થયું છે, હવે ટૂંક સમયમાં ઇમરજન્સી વિભાગને કિડની બિલ્ડિંગમાંથી ખસેડવામાં આવશે. સાથે જ જૂની સિવિલ હોસ્પિટલની જર્જરિત બિલ્ડીંગને તોડી પાડવા માટે એકશન પ્લાન તૈયાર કરવામાં આવી રહ્યો છે. આ પહેલા નોન ક્લિનિકલ વિભાગના વોર્ડને સ્ટેમ સેલ બિલ્ડિંગમાં અને ક્લિનિકલ વિભાગના વોર્ડને કિડની બિલ્ડિંગમાં શિફ્ટ કરવાની તૈયારીઓ શરૂ થઈ ગઈ છે.
નવી સિવિલ હોસ્પિટલની ઓપીડીમાં દરરોજ સેંકડો દર્દીઓ સારવાર માટે આવે છે. હોસ્પિટલના પરિસરમાં જ ઇમરજન્સી કેસ માટે અલગ ટ્રોમા સેન્ટર છે, પરંતુ ગત વર્ષે ટ્રોમા સેન્ટરનું બિલ્ડીંગ રિનોવેશનના કારણે ખાલી થઈ ગયું હતું. સાથે જ ઇમરજન્સી વિભાગને હંગામી ધોરણે નવી બનેલી કિડની બિલ્ડિંગમાં ખસેડવામાં આવ્યો હતો. હવે ટ્રોમા સેન્ટરના નવીનીકરણનું કામ લગભગ પૂર્ણ થઈ ગયું છે. ટ્રોમા સેન્ટરના ગ્રાઉન્ડ ફ્લોર પર ઈમરજન્સી વિભાગના દર્દીઓ માટે તમામ વ્યવસ્થા કરવામાં આવી રહી છે.
ઓક્સિજન પાઇપલાઇનનું કામ બાકી છે
ઓબ્ઝર્વેશન હોલમાં હજુ સુધી ઓક્સિજન પાઈપલાઈન નાખવામાં આવી નથી. આ માટે પીઆઈયુ વિભાગને ઝડપથી કાર્યવાહી કરવા સૂચના આપવામાં આવી છે. આ ઉપરાંત માઇનોર ઓપરેશન થિયેટરમાં પણ કેટલાક કામ બાકી છે. અધિકારીઓનું કહેવું છે કે નાના-મોટા કામો પૂર્ણ થયા બાદ કિડની બિલ્ડિંગમાંથી સંચાલિત ઈમરજન્સી વિભાગને જૂના ટ્રોમા સેન્ટરમાં શિફ્ટ કરવાની કવાયત કરવામાં આવશે.
બીજી તરફ જુના બિલ્ડીંગમાં કાર્યરત વિવિધ વોર્ડના ડીમોલીશનની કામગીરી ટૂંક સમયમાં શરૂ કરવામાં આવશે. રાજ્ય સરકારની સૂચના બાદ કેટલાક વિભાગોને કિડની બિલ્ડિંગમાં ખસેડવામાં આવ્યા છે, પરંતુ હજુ પણ કેટલાક વોર્ડ છે, જે જૂના બિલ્ડિંગમાંથી કાર્યરત છે. આને સ્ટેમ સેલ અને કિડની બિલ્ડિંગમાં શિફ્ટ કરવામાં આવશે.
હોસ્પિટલનું જૂનું બિલ્ડીંગ જર્જરિત થઈ જતાં થોડા મહિનાઓ પહેલા દવા અને બાળરોગ વિભાગને કિડની બિલ્ડિંગમાં ખસેડવામાં આવ્યો હતો. હવે હોસ્પિટલ પ્રશાસનના અધિકારીઓએ તેમાં ફેરબદલના સંકેત આપ્યા છે. PIU વિભાગ દ્વારા કિડની બિલ્ડિંગના ત્રીજા અને ચોથા માળે સર્જરી, ઓર્થોપેડિક, ગાયનેક અને અન્ય વોર્ડ માટે ઓપરેશન થિયેટર બનાવવાની કામગીરી પીઆઈયુ વિભાગ દ્વારા કરવામાં આવી રહી છે.
ઓપરેશન થિયેટર બન્યા બાદ ક્લિનિકલ વોર્ડને કિડની બિલ્ડિંગમાં શિફ્ટ કરવામાં આવશે. જ્યારે દવા અને બાળરોગ વિભાગને સ્ટેમ સેલ બિલ્ડીંગમાં ખસેડવામાં આવશે.
